हिउँदे बाली नलगाएर जग्गा बाँझो राख्नेलाई सरकारी सेवा-सुविधा नदिइने

मुगु, ८ मंसिर । रोग, भोक र गरिबीकाे पर्यायका रूपमा चिनिँदै आएको मुगु जिल्लामा रहेको एक मात्र नगरपालिका छायानाथ रारा नगरपालिका वडा नम्बर ४ का स्थानीयबासीले खेति गर्दै आइरहेको जग्गालाई बाँझो राखे वडा कार्यालयबाट दिइँदै आएका सरकारी सेवा-सुविधा नदिइने निर्णय भएको छ ।

मंसिर ३ गते बसेको वडापालिकाको बोर्ड बैठकले हिउँदेबाली नलगाएर जग्गा बाँझो राख्नेलाई वडाबाट प्रदान हुने कुनै पनि सेवा-सुबिधा नदिने निर्णय गरिएको वडाअध्यक्ष विष्णुकुमार भामले जानकारी दिए ।

छायानाथा रारा नगरपाका वडा नम्बर ४ मा रहेका बस्तीहरु भामबाडा, रावलबाडा र रोकायाबाडाका स्थानीयले खेती गर्दै आइरहेको जग्गा बाँझो राख्दै स्थानीय परम्परागत रुपमा लगाउँदै आएको हिउँदेबाली जौ र गहुँ लगाउन छोडेका छन् । यसैले यो बाली हराउने अवस्थामा पुगेपछि छाँयानाथ रारा नगरपालिका वडा नम्बर ४ ले यस्तो निर्णय गरेको हाे । नगरपालिकाभित्र रहेका अन्य बस्तीमध्ये यस वडा-बस्तीमा रहेको सबै जग्गामा एक वर्षमा दुईपटक अन्न बाली उत्पादन हुने गरेको छ ।

बर्षे बालीमा कोदो, धान, मकै, सिमी, फापर,आलु र हिउँदे बालीमा जौं र गहुँ लगाउने गर्दै आइरहेका छन् । यी बस्तीमा केही वर्षयता हिउँदे अन्न बाली जौँ र गहुँ लगाउन छोडेर तरकारी खेती गर्दै पनि आइरहेका छन् ।

वडा सरकारबाट जग्गा बाँझो राख्नेलाई सरकारी सेवा रोक्का गर्ने निर्णय गरेपछि कृषकहरुका लागि थप राम्रो भएको छाँयानाथ रारा नगरपालिका- ४ भामबाडाका युवा कृषक अंख भामले बताए । वडा कार्यालयको उक्त निर्णय गाउँलेलाई जानकारी गराइसकेको छाँयानाथ रारानगरपालिका- ४ का वडा अध्यक्ष विष्णुकुमार भामले जानकारी दिए । जौँ र गहुँ अन्य बालीभन्दा गोडमेल तथा खेती गर्न सजिलो भए पनि छाडा पशुचौपाया तथा हिउँदमा हिमपात कम पर्ने भएकाले बाली लगाउन छोडेको स्थानीयले बताएका छन् ।

हिउँदे बालीका लागि सबैभन्दा समस्या छाडा चौपाया नै हुन् । छाडा पशुचौपायालाई व्यवस्थापन गरे बाली लगाउन सकिने स्थानीयले बताएका छन् । चार-पाँच वर्षअगाडि पाँच हलभन्दा बढी जग्गामा लगाएको बाली बिक्रीबाट ५० हजारभन्दा बढी आम्दानी गरेको कृषक भिमबहादुर रोकाया सम्झन्छन् ।

Related Posts

Leave a Reply

Your email address will not be published. Required fields are marked *